پاکستان نے آئی سی سی ورلڈ ٹیسٹ چیمپین شپ کا فائنل کھیلنے کا سنہری موقع گنوادیا۔

قومی ٹیم ہوم سیریزمیں پہلے آسٹریلیا اوراب انگلینڈ کے ہاتھوں شکست کے بعد ٹیسٹ چیمپین شپ کے فائنل کی دوڑ سے باہر ہوگئی۔

پاکستان کو فائنل تک رسائی کے لئے انگلینڈ اور نیوزی لینڈ کے خلاف 5 میں سے 4 ٹیسٹ میچز جیتنا لازمی تھے لیکن مسلسل 2 میچز میں شکست کے بعد پاکستان کی امیدوں پرپانی پھرگیا۔

قومی ٹیم ٹیسٹ چیمپیئن شپ ٹیبل پر پانچویں سے چھٹے نمبر پر چلی گئی۔

پوائنٹس ٹیبل آئی سی سی ورلڈ ٹیسٹ چیمپئن شپ کے 2021-23 کے پوائنٹس ٹیبل پر نظر ڈالی جائے تو آسٹریلیا 75 فیصد پوائنٹس کے ساتھ سرفہرست ہے ۔

جنوبی افریقا 60 فیصد کے ساتھ دوسرے، سری لنکا 53.33 فیصد کے ساتھ تیسرے اور بھارت 52.08 فیصد کے ساتھ چوتھے، انگلینڈ 44.44 فیصد کے ساتھ پانچویں اورپاکستان 42.42 فیصد پوائنٹس کے ساتھ چھٹے نمبر پر ہے، اس سے قبل پوائنٹس ٹیبل پر پاکستان پانچوں اور انگلینڈ چھٹے نمبر پر موجود تھا۔

ویسٹ انڈیز، نیوزی لینڈ اوربنگلہ دیش بالترتیب چھٹے، ساتویں اور آٹھویں نمبر پر ہیں۔

ملتان میں کھیلے گئے ٹیسٹ میں انگلینڈ کے ہاتھوں 26 رنز سے شکست کے بعد نہ صرف پاکستان کو سیریز سے ہاتھ دھونا پڑا بلکہ قومی ٹیم ورلڈ ٹیسٹ چیمپئن شپ کے فائنل سے بھی باہر ہوگئی۔

ہوم سیریز میں پاکستان کی شکست کے بعد بھارت کے ورلڈ ٹیسٹ چیمپئن شپ کے فائنل میں پہنچنے کے امکانات روشن ہوگئے، اگر آسٹریلیا سے ایک ٹیسٹ میں بھارت کو شکست ہوجاتی ہے تو اسے بنگلادیش کے خلاف کلین سوئپ کرنا ہوگا۔