کابل میں پاکستانی سفارتخانے پر حملے کا ملزم گرفتار کرنے کا ذبیح اللہ مجاہد کے بیان پر ترجمان دفتر خارجہ ممتاز زہرا بلوچ کا رد عمل سامنے آیا ہے۔

افغان دارالحکومت کابل میں پاکستانی سفارتخانے پر حملے کا ملزم گرفتار کرنے کا ذبیح اللہ مجاہد کے دعوے پر ترجمان دفتر خارجہ ممتاز زہرا بلوچ نے رد عمل دیتے ہوئے کہا کہ ہم اس معاملے کو باریک بینی سے دیکھ رہے ہیں، تحقیقات ایک مسلسل عمل ہے۔

ترجمان دفتر خارجہ کے مطابق حملے کے معاملے پر متعلقہ افغان حکام سے رابطے میں ہیں، اعتماد ہے کہ ہیڈ آف مشن پر حملے کی مکمل تحقیقات کی جائیں گی اور حملے کے پیچھے مجرمان کو انصاف کے کٹھڑے میں لایا جائے گا۔

یاد رہے کہ گزشتہ دنوں پاکستانی سفارتخانے پرنامعلوم افراد کی جانب سے فائرنگ کی گئی تھی جس سے ایک سکیورٹی اہلکار زخمی ہوا تھا۔

واضح رہے کہ افغانستان کے قائم مقام نائب وزیراطلاعات ذبیح اللہ مجاہد کا کہنا تھا کہ اسپیشل فورسز نے غیر ملکی ملزم کو کابل سے گرفتارکیا ہے جس کا تعلق داعش سے ہے۔

ترجمان افغان حکومت کے مطابق پاکستانی سفارتخانے پر حملہ باغیوں اور داعش کی مشترکہ کارروائی تھی، جس کا مقصد دو برادرانہ ممالک میں بدگمانی پیدا کرنا تھا۔