افغانستان کے دارالحکومت کابل میں پاکستانی سفارتخانے پر حملہ کرنے والے دہشتگرد کو گرفتارکرلیا گیا ہے۔

افغانستان قائم مقام نائب وزیراطلاعات ذبیح اللہ مجاہد نے کہا کہ اسپیشل فورسز نے غیرملکی ملزم کو کابل سے گرفتارکیا ہے جس کا تعلق داعش سے ہے۔

ترجمان افغان حکومت کے مطابق پاکستانی سفارتخانے پر حملہ باغیوں اور داعش کی مشترکہ کارروائی تھی، جس کا مقصد دو برادرانہ ممالک میں بدگمانی پیدا کرنا تھا۔ اس معاملے میں مزید تحقیقات جاری ہیں۔

گزشتہ روز ہی پاکستانی سفارتخانے پرحملے کی ذمہ داری داعش کی جانب سے قبول کی گئی تھی۔ خبر رساں ایجنسی روئٹرزکے مطابق داعش نے اعترافی بیان ٹیلی گرام کے ذریعے جاری کیا۔

واضح رہے کہ پاکستانی سفارتخانے پرنامعلوم افراد کی جانب سے فائرنگ کی گئی تھی جس سے ایک سیکیورٹی اہلکار زخمی ہوا تھا جس کو تین گولیاں لگیں جبکہ پاکستان کے ناظم الامور فائرنگ سے محفوظ رہے ہیں۔

ذرائع کا کہنا تھا کہ فائرنگ کا واقعہ اس وقت پیش آیا جب پاکستان کے ناظم الامور اوران کا عملہ سفارت خانے میں موجود تھا۔