پاکستان تحریک انصاف کے چیئرمین عمران خان سے ترجمان پنجاب حکومت مسرت جمشید چیمہ نے ملاقات کی ہے۔

ترجمان پنجاب حکومت مسرت جمشید چیمہ نے زمان پارک لاہور میں چیئرمین پی ٹی آئی عمران خان سے ملاقات کی اور 26 نومبر کے حقیقی آزادی مارچ کی تیاریوں سے آگاہ کیا۔

ترجمان پنجاب حکومت نے کہا کہ پاکستان کے عدالتی مفرور سے پاکستان کے اہم ترین معاملات پر ہدایات لینا غیر قانونی اور غیر آئینی ہے، اگر ضرورت پڑی تو چئیرمین پی ٹی آئی، صدر پاکستان سے اس معاملے پر گفتگو اور لائحہ عمل سے آگاہ کریں گے۔

مسرت جمشید چیمہ نے مزید کہا کہ عمران خان خود پر قاتلانہ حملے کے بعد بھی حقیقی آزادی مارچ کو لیڈ کرنے کے لئے پرعزم ہیں۔

انہوں نے مزید کہا کہ ہم کسی صورت اس ملک کو چوروں کے رحم و کرم پر نہیں چھوڑ سکتے، 26 مارچ کو عوام عمران خان سے محبت کا عملی ثبوت دکھائیں گے۔