اسلام آباد: جنوبی افریقا کی نیشنل ڈیفنس فورس کے سربراہ جنرل مافوانیا کو جوائنٹ اسٹاف ہیڈ کوارٹرز پہنچنے پر گارڈ آف آنر پیش کیا گیا۔

پاک فوج کے شعبہ تعلقات عامہ (آئی ایس پی آر) کے مطابق جنرل مافوانیا نے جوائنٹ اسٹاف ہیڈ کوارٹرز کے دورے پر چیئرمین جوائنٹ چیف اسٹاف کمیٹی جنرل ندیم سے ملاقات کی جس میں مختلف شعبوں اور سکیورٹی و انسداد دہشتگردی پر تبادلہ خیال کیا گیا۔

آئی ایس پی آر کے مطابق ملاقات میں فریقین نے دونوں ممالک کے درمیان تعلقات کو مزید مضبوط بنانے کے عزم کا اعادہ کیا، اس موقع پر جنرل ندیم کا کہنا تھا کہ پاکستان جنوبی افریقا کے ساتھ فوجی تعاون بڑھانے کا خواہاں ہے۔

انٹر سروسز پبلک ریلیشنز کے مطابق سربراہ جنوبی افریقا نیشنل ڈیفنس نے پاکستانی افواج کی مہارت کو سراہا اور انہوں نے دہشت گردی کے خلاف افواج پاکستان کی قربانیوں کا بھی اعتراف کیا۔