اگر آپ کی ازدواجی زندگی مسائل اور جھگڑوں کا شکار ہے تو اس کا حل ایک معمولی سے لفظ میں پوشیدہ ہے۔

نئی تحقیق بتاتی ہے کہ اگر آپ لمبی اور خوشگوار ازدواجی زندگی چاہتے ہیں تو ہر موقع پر اپنے شریک حیات کا شکرگزار ہونا پڑے گا، یعنی اگر شریک حیات سے کوئی کام کرانے کے بعد ”شکریہ“ کہا جائے تو آپ کی ازدواجی زندگی انتہائی سہل ہوسکتی ہے۔

امریکہ میں جارجیا یونیورسٹی میں ایسوسی ایٹ پروفیسر اور مطالعہ کے شریک مصنف ٹیڈ فوٹریس کہتے ہیں کہ “ اپنے شریک حیات کی جانب سے چاہے جانے اور قدر کئے جانے کا احساس اس پر براہ راست اثر ڈالتا ہے کہ آپ اپنی ازدواجی زندگی کے بارے میں کیا سوچتے ہیں، آپ اسے نبھانے کے لیے کتنے پرعزم ہیں اور آپ یقین رکھتے ہیں کہ یہ قائم رہے۔“

تحقیق میں ٹیلی فون سروے کے استعمال کرتے ہوئے 468 شادی شدہ افراد سے ان کی مالی حالت، مواصلات اور شریک حیات کی جانب سے شکریہ کے اظہار کے بارے میں سوالات پوچھے گئے۔ نتائج نے اشارہ دیا کہ شریک حیات کا اظہار تشکر پائیدار ازدواجی زندگی کا سب سے مستقل پہلو تھا۔

جارجیا یونیورسٹی سے مطالعہ کے مرکزی مصنف ایلن بارٹن نے کا کہنا ہے کہ ”اس سے معمولی سے لفظ ’شکریہ‘ کی طاقت ظاہر ہوتی ہے۔“

مطالعہ میں یہ بھی پایا گیا کہ زوجین کے اظہار تشکر نے مردوں اور عورتوں میں طلاق کے رجحان کے ساتھ ساتھ خواتین کی ازدواجی وابستگی کو تنازعات کے دوران خراب مواصلات کے منفی اثرات سے محفوظ رکھا۔