سابق وزیر داخلہ شیخ رشید کا کہنا ہے کہ رات کے اندھیرے میں ہنگامی کیبنٹ بلائی جاتی ہے اور رات کے اندھیرے میں ہی منسوخ کردی جاتی ہے، ان کی خواہشیں خبر نہیں بن سکتی۔

اپنے ٹوئٹر بیان میں شیخ رشید نے کہا کہ آصف زرداری بھی سازش میں کمیٹی ڈالنے کیلئے اسلام آباد پہنچ گئے ہیں، حکومت سیاسی فائربال سے کھیل رہی ہے۔

ان کا کہنا تھا کہ جتنا سیاسی گند پڑھ گیا ہے دس سے پندرہ روز میں صاف ہوجائے گا۔

انہوں نے مزید کہا کہ پہلے مجھے قتل کی دھمکیاں مل رہی تھی، اب لال حویلی کے اوپر ڈرون چلایا جا رہا ہے، جس کی ویڈیو حکام بالا کو بھیج رہے ہیں، یہ عمران خان کے لانگ مارچ سے پہلے اور اس کے دوران پنڈی میں شرارت کرنا چاہتے ہیں۔

شیخ رشید نے کہا کہ ناکامی ان کا مقدر ہے،پنڈی پرامن شہر ہے،میں کمیٹی چوک میں لانگ مارچ کا استقبال کروں گا۔