پاکستان تحریک انصاف (پی ٹی آئی) کے چئیرمین عمران خان نے کھاریاں میں آزادی مارچ سے خطاب میں ترکیہ میں ہونے والے دھماکے پر افسوس کا اظہار کرتے ہوئے کہا کہ ترکیہ دھماکے میں لوگ جاں بحق اور زخمی ہوئے، میں ترکیہ کے صدر سے اظہار افسوس کرتا ہوں۔

عمران خان نے پاکستانی ٹیم کو فائنل میں پہنچنے پر مبارکباد دی اور کہا کہ آج بہت عرصےبعد میں نے کرکٹ میچ دیکھا۔ چئیرمین پی ٹی آئی نے کہا کہ بابر اعظم دنیا کا بہترین بلے باز ہے۔

عمران خان نے کہا کہ 7 ماہ سے کہہ رہا ہوں کہ ملک کو تباہی کی طرف لے جارہے ہیں اور جو معیشت کو تباہ کرتے ہیں، وہ ٹھیک نہیں کرسکتے جب کہ مسئلہ لندن میں پھنسا ہوا ہے اور مفرور الیکشن ہارنے کے خوف سے الیکشن نہیں کروارہا۔

چیئرمین پی ٹی آئی عمران خان نے کہا کہ ان کا لانگ مارچ این آر او کے لیے تھا اور ہمارے دور میں انہوں نے 3 لانگ مارچ کیے جن میں سے ایک تو اسلام آباد تک بھی نہیں پہنچ سکا۔

سابق وزیراعظم کا کہنا تھا کہ مشکل میں آتے ہیں تو یہ لندن بھاگ جاتے ہیں، یہ 30 سال سے ملک کا پیسہ چوری کرکے باہر لے جارہے ہیں، قوم نے ان کو مسترد کردیا ہے ، قوم سمجھتی ہے کہ جو تجربہ کیا گیا وہ ناکام ہوچکا ہے۔

انہوں نے مزید کہا کہ لندن میں بیٹھا مفرور کہہ رہا ہے کہ الیکشن نہیں کروانے، خود کو بچانے کیلئے ملک کو تباہی کی جانب دھکیلا جارہا ہے، ملک کو دلدل سے نکالنے کیلئے فوری انتخابات ضروری ہیں۔

عمران خان نے کہا کہ لندن فلیٹس کا انکشاف پاناما لیکس میں ہوا تھا۔ نوازشریف، شہبازشریف، اسحاق ڈار کے بچے باہر بیٹھے ہیں، کرپشن کرنے والے ملک کے مستقبل کا فیصلہ کررہے ہیں۔

عمران خان کا کہنا تھا کہ ان لوگوں نے آج تک ایک آدمی میرٹ پر نہیں رکھا، ان لوگوں کا مقصد صرف اپنی چوری کا پیسہ بچاناہے۔

ان کا کلہنا تھا کہ پوری قوم نے موجودہ حکومت کو مسترد کردیا ہے، پورے پاکستان کے لوگ راولپنڈی آرہے ہیں۔ ملکی قیادت کون کرےگا فیصلہ عوام کریں گے، لانگ مارچ کا مقصدقوم کو جگانا ہے۔

پی ٹی آئی چئیرمین نے کہا کہ موجودہ دورمیں دنیا میں پاکستان کا وقار کم ہوا ہے، میں آزاد اور خوددار فارن پالیسی چاہتا تھا۔

ان کا مزید کہنا تھا کہ عمران خان ہمارے دور میں ٹیکسٹائل انڈسٹری کو مزدور نہیں مل رہے تھے، آج فیصل آباد میں مزدور سے روزگار کا حال پوچھیں، سات ماہ میں مہنگائی اور بیروزگاری بڑھ گئی ہے۔