اسلام آباد میں پاکستان تحریک انصاف کے کارکنوں کے ہاتھوں اپنا موٹرسائیکل جلائے جانے پررونے والے رائیڈرکی خوشیاں لوٹا دی گئیں۔

اسلام آباد اور راولپنڈی کے سنگم پر احتجاج کرنے والے مشتعل پی ٹی آئی کارکنوں نےگزشتہ روز آن لان سروس کیلئے بائیک چلانے والے نوجوان کی موٹرسائیکل جلادی تھی جس کے بعد نوجوان کے رونے کی ویڈیو سوشل میڈیا پر وائرل ہوئی تھی۔

اپنا ذریعہ روزگارچھن جانے پرانتہائی دل شکستہ نوجوان ویڈیومیں روتے ہوئے وفاقی پولیس کو بتارہا ہے کہ میں روزکا ایک ہزار روپیہ کما کرگھر کا خرچ پورا کرتا تھا، پی ٹی آئی کے 50 سے 60 بندے یہاں موجود تھے جنہوں نے موٹرسائیکل جلادی۔

پولیس کی جانب سے سوال کیے جانے پرنوجوان کا کہنا تھا کہ اسے مارا پیٹا نہیں گیا۔

ویڈیو دیکھ کرہیلپنگ ہینڈز ٹرسٹ نامی این جی او کے چیئرمین فیصل جمیل نے نوجوان کو نئی موٹرسائیکل خریدنے کیلئے 91 ہزار روپے کا چیک دیا۔

نوجوان نے جلائی جانے والی موٹرسائیکل حال ہی میں 91 ہزار روپے میں ہی خریدی تھی جس کی نمبرپلیٹ کے لیے بھی اپلائی کررکھا تھا۔

تازہ ویڈیومیں نوجوان نے بڑے بھائی کے ہمراہ خوشی کااظہارکرتے ہوئے چیئرمین ہینڈز ٹرسٹ کا شکریہ اداکیا۔

نوجوان کی ویڈیو وائرل ہونے کے بعد لیگی رہنما حنیف عباسی کی جانب سے اسے نئی موٹرسائیکل دینے کا اعلان کیا گیا تھا، ان کا کہنا تھا کہ اتوار والے روز نوجوان کو گھربلا کرنئی موٹرسائیکل دوں گا.

ن لیگ کی نائب صدرمریم نواز نے بھی نوجوان کا رابطہ نمبردینے کی درخواست کی تھی۔