ٹی 20 ورلڈ کپ کیلئے بھارت میں موجود بھارتی کرکٹ ٹیم کے سابق کپتان ویرات کوہلی نے ہوٹل میں اپنے کمرے کی ویڈیو لیک ہونے پرناراضگی کا اظہار کرتے ہوئے پوچھا ہے کہ اگرہوٹل کے کمرے میں بھی پرائیویسی نہیں تو میں اور کہاں توقع رکھ سکتا ہوں۔

کوہلی نے سوشل میڈیا پر وائرل ویڈیواپنے انسٹاگرام پرشیئرکی جو کسی نے علم میں لائے بغیرکوہلی کی غیرموجودگی میں بنائی۔

ویڈیو میں پرتھ میں واقع ہوٹل کے کمرے میں رکھے گئے کوہلی کے ذاتی سامان کو انتہائی قریب سے دکھایا گیا ہے، ان کے جوتے، کپڑے، کٹس اور ذاتی استعمال کی دیگر اشیاء نمایاں ہیں۔

اس حوالے سے ناراضگی کااظہارکرنے والے کوہلی نے لکھا کہ وہ اس بات کو سمجھتے ہیں کہ مداح اپنے پسندیدہ کھلاڑیوں کودیکھ کربہت خوش اوران سے مل کر جذباتی ہوجاتے ہیں اوروہ خود ہمیشہ اس چیز کوسراہتے ہیں لیکن اس ویڈیو سے انہیں دھچکا پہنچا ہے اور وہ اپنی پرائیویسی کے حوالے سے بہت زیادہ وسوسوں کا شکارہیں۔

کوہلی نے مزید لکھا کہ اگرہوٹل کے کمرے میں پرائیویسی نہیں ہے تو میں اپنی ذاتی زندگی میں کون سی جگہ پر اس کی توقع کرسکتا ہوں۔

سابق بھارتی کپتان نے واضح کیا کہ وہ اس قسم کی جنونی چاہت اور رازداری پرحملےکے خلاف ہیں ، انہوں نے درخواست کی کہ براہ کرم لوگوں کی پرائیویسی کا احترام کریں اورانہیں تفریح کا ذریعہ نہ سمجھیں۔

کوہلی کی اہلیہ اداکارہ انوشکا شرما نے انسٹااسٹوریزمیں اس اقدام کی شدید مذمت کی۔

کرکٹرکی اس پوسٹ پر پری نیتی چوپڑہ، ورون دھون، سابق آسٹریلوی بیٹسمین ڈیوڈ وارنرسمیت متعدد معروف شخصیات نے تبصرہ کرتے ہوئے اس ویڈیو کوانتہائی غلط حرکت قراردیا۔