پی ٹی آئی سربراہ عمران خان کی اقتدارسے رخصتی کا ایک سبب یہ بیان کیا جاتا ہے کہ ان کے اسٹیبلشمنٹ سے اختلافات ہوگئے تھے تاہم ان اختلافات کے حتمی محرکات کا تعین اب تک نہیں ہوسکا تھا۔

جمعرات کو آئی ایس آئی سربراہ لیفٹننٹ جنرل ندیم انجم اور پاک فوج کے ترجمان لیفٹننٹ جنرل بابر افتخار کی مشترکہ پریس کانفرنس کے دوران ان اختلافات کے بارے میں ایک اہم انکشاف سامنے آیا۔

پاکستان کو درپیش خطرات کے حوالے سے ایک سوال کا جواب دیتے ہوئے جنرل ندیم انجم نے کہا کہ جب وہ آئی ایس آئی سربراہ بنے تو ان سے پوچھا گیا کہ پاکستان کا بڑا مسئلہ کیا ہے۔ جواب میں انہوں نے کہا کہ پاکستان کا سب سے بڑا مسئلہ معیشت ہے۔

جنرل ندیم انجم کے مطابق سوال پوچھنے والے نے ان سے اتفاق نہیں کیا اور ان کے خیال میں حزب اختلاف پاکستان کا سب سے بڑا مسئلہ تھی۔

آج نیوز کی تجزیہ نگار اور میزبان عاصمہ شیرازی کے مطابق جنرل ندیم انجم نے بہت کم لفظوں میں بہت ساری باتیں بتا دی ہیں۔

پریس کانفرنس کے دوران یہ سوال بھی کیا گیا کہ عمران خان کو لانے میں ادارے کا بھی کردار تھا۔ جواب میں جنرل ندیم انجم نے مسکراتے ہوئے کہا،“ اس پر سیر حاصل بحث پھر کبھی ہو سکتی ہے۔“