آرٹس کونسل آف پاکستان کراچی کے صدر محمد احمد شاہ 15 روزہ دورے پر امریکا میں ہیں جہاں وہ آئندہ سال کینیڈا، امریکا اور دبئی میں مجوزہ عالمی اردو کانفرنس کے انتظامات کو حتمی شکل دیں گے۔

واضح رہے کہ گورننگ باڈی کے فیصلے کے مطابق 7 اور 8 جولائی 2023ءکینیڈا کے شہر ٹورنٹو میں عالمی اردو کانفرنس منعقد کرنے کی تجویز ہے جب کہ اس کے بعد امریکا کے شہر شکاگو اور 14،15 اگست کو دبئی میں منعقد کی جائے گی۔

محمد احمد شاہ امریکا میں ایشین سوسائٹی کی صدر سمیت مختلف تنظیموں اور شخصیات سے ملاقاتیں کر رہے ہیں تاکہ بین الاقوامی سطح پر پہلی مرتبہ منعقد ہونے والی اردو زبان کی ان کانفرنسوں کو کامیاب بنایا جا سکے۔

دورے کے دوران اس ایم او یو کو بحال کرنے پر بھی بات چیت ہو گی تاکہ آرٹس کونسل آف پاکستان کراچی کے پروگرام کو بین الاقوامی سطح پر متعارف کرایا جا سکے۔

یاد رہے کہ1966ءمیں ایشین سوسائٹی نیو یارک اور آرٹس کونسل آف پاکستان کراچی کے درمیان ایم او یو پر دستخط ہوئے تھے جس کے تحت دونوں اداروں کے درمیان نمائشوں اور پروگراموں کا تبادلہ ہونا تھا۔