نشتر اسپتال ملتان میں لاوارث لاشوں کی بے حرمتی کے معاملے پر فلاحی ادارے ایدھی سنٹر کے ذمہ داروں نے اہم انکشافات کر دیے۔

انچارج ایدھی سنٹر نشتر اسپتال رانا محمد اشفاق کا کہنا ہے کہ نشتر اسپتال انتظامیہ کی جانب سے گزشتہ چھ ماہ سے کوئی لاوارث لاش نہیں دی گئی۔

رانا محمد اشفاق کا کہنا ہے کہ چھ ماہ قبل نشتر اسپتال انتظامیہ سے لاوارث لاشوں کی تدفین پر بات ہوئی تھی۔ گزشتہ سال 12 ایک دفعہ اور 18 لاشیں ایک دفعہ دفنائی تھیں۔

انہوں نے کہا کہ اگر کوئی لاش دی جاتی ہے تو اس کی فوری تدفین کی جاتی ہے۔ ہم نے نشتر میڈیکل یونیورسٹی انتظامیہ کو الگ قبرستان کیلئے ضلعی انتظامیہ کے تعاون بھی کہا تھا۔

انہوں نے اس بات پر زور دیا کہ لاشوں کی شناخت کا عمل یقینی نہیں بنایا جاتا، جس پر انہوں نے تجویز دی کہ ہر آنے والی لاش کے آتے ہی تصویر بناکر رجسٹرڈ میں اندراج کرلیا جائے۔

ایدھی سنٹر نشتر روڈ کے انچارج نے شکوہ کرتے ہوئے بتایا کہ لوگ لاشیں ڈھونڈنے کے لیے پریشان ہوتے ہیں۔

ان کا کہنا تھا کہ الگ قبرستان نہ ہونے کی وجہ سے بھی لاشیں گل سڑ رہی ہیں اور انکی بے حرمتی ہو رہی ہے۔