نوبیل انعام یافتہ ملالہ یوسفزئی کی فلاحی تنظیم ملالہ فنڈ نے پاکستان میں سیلاب زدگان کی امداد کے لیے 7 لاکھ ڈالر کا اعلان کیا ہے۔

ایک بیان میں تنظیم ملالہ فنڈ کا کہنا ہے کہ اپنی طرف سے عطیہ کی گئی ابتدائی ہنگامی امدادی رقم کے علاوہ ملالہ فنڈ نے پاکستان میں امدادی اقدامات کرنے والی تنظیموں کو 7 لاکھ ڈالر (پاکستانی روپے میں تقریباً 15 کروڑ 40 لاکھ) تک کا مزید وعدہ کیا ہے۔

تنظیم نے کہا کہ یہ ایک ایسی سرمایہ کاری ہے جس میں مقامی پارٹنرز کو براہ راست فنڈنگ فراہم کرنا اور سیلاب ریلیف فنڈ میں شراکت داری دونوں شامل ہیں۔

اس ضمن میں ملالہ یوسفزئی کا کہنا تھا کہ اس قدر وسیع پیمانے پر تباہی ہوئی کہ یقین کرنا مشکل ہے، مختلف افراد بلخصوص خواتین اور لڑکیوں کی زندگیوں پر مرتب ہونے والے نفسیاتی و معاشی اثرات ناقابل بیان ہیں۔

ملالہ نے کہا کہ لاکھوں پاکستانی موسمیاتی تبدیلیوں کے نتائج بھگت رہے ہیں۔ عالمی رہنماوں کو آگے بڑھنے کے ساتھ اپنے جوابی اقدامات کے منصوبوں کو تیز اور پاکستان کی تعمیر نو اور متاثرہ آبادی کی مدد کے لیے درکار مالی امداد کا سلسلہ تیز کرنا چاہیے۔