پی ٹی آئی کے لانگ مارچ سے قبل ان کی اپنی ہی جماعت سے تعلق رکھنے والے صدرعارف علوی نے گزشتہ رات سائفرسے متعلق اپنا موقف واضح کرتے ہوئے نیا طوفان کھڑاکردیاہے

اپنے خلاف تحریک عدم اعتماد کی کامیابی کے بعد سے سابق وزیراعظم اورچیئرمین پی ٹی آئی عمران خان سائفر کے سہارے ہی غیرملکی سازش کے بیانیے کو تقویت دے کرعوام کی ہمدردیاں حاصل کررہے تھے مگرصدرکے بیان نے ان کے بیانیے سے متعلق کئی سوالات کا جنم دیا ہے۔

گزشتہ رات آج نیوز کے پروگرام ”فیصلہ آپ کا“ میں شریک صدر مملکت کا کہنا تھا کہ وہ اس بات پر قائل نہیں ہیں کہ عمران خان کو وزارت عظمیٰ سے ہٹانے کیلئے کوئی غیرملکی سازش کی گئی تھی، تاہم اس معاملے کی تحقیقات ہونی چاہئیں۔

چیف جسٹس کوسائفرکی تحقیقات کیلئے خط بھیجنے کا حوالہ دینے والے صدر عارف علوی کا اسمبلیوں سے استعفے دینے سے متعلق یہ بھی کہنا تھا کہ اگرعمران ان سے مشورہ کرتے تو وہ اچھا مشورہ دے سکتے تھے۔

پارٹی چیئرمین کے موقف سے بالکل ہی متضاد بیان پرجہاں پی ٹی آئی رہنما حیرت کا شکارہیں وہیں سوشل میڈیا صارفین نے بھی تبصروں میں صدرکےاس بیان پراپنا موقف ظاہرکیا ہے۔

پارٹی سے دلی وابستگی رکھنےوالے تو صدرکا یہ بیان کسی طور تسلیم کرنے کو تیار نہیں تاہم ایسا نہ کرنے والوں نے سنجیدہ اور دلچسپ ٹویٹس میں اپنے جذبات کا اظہارکیا۔