رہنما پیپلز پارٹی اور صوبائی وزیر اطلاعات شرجیل انعام میمن نے چیئرمین پاکستان تحریک انصاف عمران خان کی آڈیو کا فرانزک کرانے کا مطالبہ کرددیا۔

کراچی میں پریس کانفرنس کرتے ہوئے شرجیل میمن نے کہا کہ عمران خان کو آئین و قانون کی روشنی میں گھر بیھجا گیا، وہ جو الزامات دوسروں پر لگاتے تھے خود اس میں ملوث نکلے۔

شرجیل میمن نے کہا کہ عمران خان ملک کے نا کام ترین وزیراعظم رہے، انہوں نے دوست ممالک کے ساتھ تعلقات خراب کئے، آڈیو میں ثابت ہوگیا عمران خان نے 5 ارکان خریدے، لہٰذا ارکان کو خریدنے پر انکوائری ہونی چاہئے۔

پی پی رہنما کا مزید کہنا تھا کہ جس نے 5 ووٹ خریدے مطلب کرپشن کے پیسوں سے خریدے، عمران خان کے خلاف قانونی کارروائی کے علاوہ ان کی آڈیو کا فرانزک کرایا جائے۔