اسحاق ڈار کے وطن واپس لوٹتے ہی ملک میں سٹے باز پریشانی میں مبتلا ہوگئے۔

آج نیوز کے پروگرام ’پاکستان اکنامی شو‘ میں گفتگو کرتے ہوئے ماہرِ معاشیات ڈاکٹر فرخ سلیم نے کہا کہ چوتھی بار وزیر خزانہ بننے والے اسحاق ڈار کی وجہ سے اوپن مارکیٹ و انٹر بینک کے سٹے باز خوف کا شکار ہوگئے ہیں۔

فرخ سلیم نے کہا کہ سٹے بازاور منافع خور خوف میں مبتلا اسی لئے ہوئے ہیں کہ شاید وزیر خزانہ اپنے دفتر کی اتھارٹی کو استعمال کرنا جانتے ہیں جس کی وجہ سے ڈالر کے بھاؤ میں کمی واقع ہو رہی ہے۔

انہوں نے کہا کہ ملک میں ڈالر کا فقدان سب سے سنگین معاملہ ہے، ہمارے پاس ڈالر تیزی ختم ہو رہے ہیں یا ممکنہ طور پر ختم ہوچکے ہیں جس کی اہم وجہ اربوں ڈالرز کی درآمدات ہونے کے ساتھ برآمدات نہ ہونا ہے۔

ڈاکٹر فرخ نے کہا کہ عالمی منڈیوں میں تیل کے بھاؤ میں کمی ہو رہی ہے جس کے تحت اسحاق ڈار ملک میں پیٹرولیم مصنوعات کی قیمتوں میں کمی کرکے قوم کو ریلیف فراہم کر سکتے ہیں۔

ماہرِ معاشیات نے بتایا کہ بین الاقوامی مارکیٹ میں کوکنگ آئل کی قیمتوں میں ببھی کافی کمی ہوگئی ہے جس کے پیشِ نظر ملک میں بھی کھانے پکانے کے تیل کے نرخوں میں کمی کی جا سکتی ہے۔