وفاقی وزیر داخلہ رانا ثنا اللہ کا کہنا ہے کہ جس دن عمران خان اسلام آباد آئیں گے، اس دن ان کا معاملہ تمام ہوجائے گا۔

ایک بیان میں رانا ثنا اللہ نے کہا کہ عمران خان 15 سے 20 ہزار بندوں کو لائے گا اسی لئے ہم 50 ہزار بندوں کو انہیں کنٹرول کرنے کی تیاری کر رہے ہیں۔

وزیر داخلہ نے کہا کہ جس دن عمران خان آئے گا، اس کا معاملہ تمام ہوجائے گا، 24 گھنٹے میں ہم اسے جگ میں بند کرکے ڈھکن لگا دیں گے۔

واضح رہے کہ پاکستان تحریک انصاف (پی ٹی آئی) کے ممکنہ اسلام آباد میں لانگ مارچ کے پیش نظر وفاقی پولیس نے تیاریاں شروع کردی ہیں۔

ذرائع کے مطابق اسلام آباد پولیس نے صوبوں سے پولیس، رینجرز اور ایف سی کے تقریباً 30 ہزار اہلکار طلب کرلیے ہیں۔

پولیس، رینجرز کے علاوہ داخلی راستوں پر کنٹینرز بھی لگانے کے ساتھ خندقیں بھی کھودی جائیں گی۔

وفاقی پولیس کی جانب سے مظاہرین پر شیلنگ کے لئے آنسو گیس شیل، آنسو گیس پھینکنے والے ڈرونز بھی منگوائے گئے ہیں۔