بالی ووڈ اداکارہ کنگنا رناوت نے بھارت کے مشہور جریدے ‘فلم فیئر’ کے خلاف مقدمہ درج کرنے کا فیصلہ کیا ہے۔

بھارتی میڈیا رپورٹ کے مطابق اداکارہ کی جانب سے یہ اقدام اس وقت کیا گیا جب ‘فلم فیئر’ نے انہیں ان کی فلم ‘تلائیوی’ میں بہترین اداکارہ کے ایوارڈ کے لیے نامزد کیا۔

کنگنا نے اپنی انسٹا گرام اسٹوری پر طویل نوٹ لکھتے ہوئے بتایا کہ وہ غیر اخلاقی، کرپٹ اور غیر منصفانہ نظام کی وجہ سے سن 2014 سے فلم فیئر ایوارڈز میں شرکت نہیں کر رہیں۔

ان کے بقول، فلم فیئر ایوارڈز میں شرکت کے بائیکاٹ کے باوجود ان کی جانب سے متعدد کالز موصول ہو رہی ہیں اور انہوں نے مجھے فلم تلائیوی میں اداکاری کے لیے نامزد بھی کیا ہے۔

اداکارہ نے کہا کہ “میں حیران ہوں کہ یہ اب بھی مجھے نامزد کر رہے ہیں، اس طرح کے غیر منصفانہ نظام کی حوصلہ افزائی کرنا میرے وقار، کام اور اخلاقیات کے خلاف ہے۔ اسی لیے میں نے فلم فیئر پر مقدمہ درج کرنے کا فیصلہ کیا ہے۔

کنگنا نے دعویٰ کیا کہ 2013 میں فلم فیئر نے انہیں صاف الفاظ میں کہا تھا کہ اگر وہ ایوارڈز شو میں شرکت یا اسٹیج پر ڈانس نہیں کرتیں تو انہیں ایوارڈ نہیں ملے گا۔

انہوں نے مزید بتایا کہ فلم فیئر نے بالآخر انہیں نامزد کرنے کا فیصلہ واپس لے لیا ہے، تاہم انہوں نے یہ بھی کہا کہ وہ اب بھی فلم فیئر کے خلاف قانونی چارہ جوئی کرنے سے پیچھے نہیں ہٹیں گی۔

مذکورہ میگزین کی اس حرکت پر اظہارِ برہمی کرتے ہوئے کنگنا رناوت نے کہا ہے کہ وہ فلم فیئر ایوارڈز کے خلاف مقدمہ کریں گی، کنگنا نے ‘فلم فیئر’ کو مخاطب کرتے ہوئے کہا کہ اب ان کی ملاقات عدالت میں ہوگی۔

واضح رہے کہ اداکارہ کنگنا رناوت کی فلم ‘تلائیوی’ سن 2021 میں سنیما گھروں کی زینت بنی تھی۔