یاسرعالم آمین جماعت نہم کے ماہانہ امتحان کے تین پرچے دے چکا تھا، آج بروز بدھ (آٹھ اگست) اس کا چوتھا پرچہ تھا اور وہ ٹیسٹ میں اوّل آنے کا خواہش مند تھا، تاہم اس کی یہ آرزو پوری نہ ہو سکی اور وہ سانحے میں شہید ہو کر اس دنیا سے رخصت ہو گئے۔

چھ اگست کو پاکستان تحریک انصاف (پی ٹی آئی) کے ممبر صوبائی اسمبلی ملک لیاقت کی گاڑی پر گل لعل قلعہ کے مقام پر نامعلوم افراد نے فائرنگ کی، جس کے نتیجے میں یاسر عالم سمیت 4 افراد جاں بحق جبکہ 4 افراد زخمی ہوگئے تھے۔

ٹیسٹ کے دوران یاسر کی کرسی خالی دیکھ کر اساتذہ کرام بھی آبدیدہ ہوگئے، انہوں نے شہید کی خالی کرسی پر گلدستہ رکھا اور وائٹ بورڈ پر لکھا، “سوری میں اپنا امتحان پورا نہ کرسکا۔”

وائٹ بورڈ پر درج ان بوجھل الفاظ نے پورے ماحول کو غم ناک بنا دیا، اساتذہ سمیت طلباء بھی یہ صورت حال برداشت نہ کر سکے اور زار و قطار رونے لگے۔

ایسا معلوم ہورہا تھا کہ یہ خالی کرسی یاسر عالم کے لیے انصاف کا تقاضہ کررہی ہے، جو حکومت وقت اور دیگر اداروں کے لئے ایک کھلا چیلنج ہے کہ وہ سانحہ میدان میں شہید ہونے والے یاسر عالم کو انصاف فراہم کرسکیں۔