اسلام آباد: سابق صدر آصف علی زرداری نے اسپیکر قومی اسمبلی راجا پرویز اشرف کو چیئرمین پاکستان تحریک انصاف (پی ٹی آئی) عمران خان سمیت 8 اراکین کے استعفے منظور کرنے سے روک دیا۔

پی ٹی آئی اراکین کی جانب سے قومی اسمبلی میں جمع کرائے گئے استعفے تاحال منظورنہیں ہوسکے ہیں، فائل اسپیکر کی میز پرموجود ہے لیکن اسپیکر راجا پرویزاشرف نے تاحال دستخط نہیں کیے۔

اس حوالے سے حکومتی ذرائع کا کہنا ہے کہ مذاکرات کا دروازہ کھلا رکھنے کے لیے استعفے منظور نہیں ہوئے، استعفوں سے متعلق فیصلہ قومی اسمبلی کے آئندہ اجلاس میں ہوگا۔

شعبہ قانون سازی کا کہنا ہے کہ ہوم ورک مکمل ہے، استعفوں سے متعلق فیصلہ اسپیکر کو کرنا ہے۔

شعبہ قانون سازی کے مطابق اراکین تصدیق کے لیے نہیں آئے اس لیے وہ ابھی تک رکن ہیں۔

واضح رہے کہ ن لیگ نےعمران خان سمیت 8 اراکین کے استعفے منظور کرنے کا مطالبہ کیا تھا۔