اسلام آباد: عوامی مسلم لیگ کے سربراہ شیخ رشید نے آصف زرداری الزام لگاتے ہوئے کہا ہے کہ جہاں ووٹوں کی خریدوفروخت ہو سمجھ جائیں آصف زرداری اس کے پیچھے ہے۔

سابق وزیرداخلہ شیخ رشید احمد نے اوورسیز پاکستانیوں کے ووٹ سے متعلق درخواست سپریم کورٹ میں دائرکردی۔

انتخابی اصلاحات ترامیم کو چیلنج کرتے ہوئے وفاق، وزارت پارلیمانی امور، قانون، کابینہ اور الیکشن کمیشن کو فریق بنایا گیا۔

بعدازاں میڈیا سے گفتگو کرتے ہوئے شیخ رشید نے کہا کہ اوورسیزپاکستانیوں کا ووٹ ان کا بنیادی حق ہے، ان کو ووٹ کے حق سے محروم نہیں کیا جاسکتا،موجودہ حکومت اس معاملے پرتاخیری حربے استعمال کررہی ہے۔

سابق وزیرداخلہ نے آصف زرداری پربھی ووٹوں کی خریدوفروخت کا الزام عائد کیا اور کہا کہ آصف زرداری خرید و فروخت کی منڈی لگاتا ہے۔

شیخ رشید نے مزید کہاکہ شجاعت کا بیٹاپرویزالٰہی کےساتھ کھڑا ہوگا،پی ٹی آئی نے پرویزالٰہی کو وزیراعلیٰ پنجاب کیلئے نامزد کیا ہے، کل یا پرسوں حلف اٹھالیں گے۔

اس سے قبل سماجی رابطے کی ویب سائٹ ٹوئٹر پرسابق وفاقی وزیرشیخ رشید نے اپنے ٹویٹ میں لکھا کہ سیاسی عدم استحکام معاشی قیامت کو جنم دے رہا ہے، ڈالر 226 روپے کا ہونے کے باوجود آئی ایم ایف کے ساتھ ابھی بھی بیل آؤٹ معاہدہ طے نہیں پایا۔

سیاسی عدم استحکام معاشی قیامت کو جنم دے رہا ہے۔ 226کے ڈالر کے ہونے کے باوجود،IMF کے ساتھ ابھی بھی بیل آؤٹ معاہدہ طے نہیں پایا۔اکتوبر نومبر میں عام انتخابات کے علاوہ کوئی حل نہیں۔پھر کوئی بھی حکومت نہیں کر پائے گا۔اوورسیز ووٹوں کے لیے ابھی سپریم کورٹ جارہا ہوں،شام کو لاہور جاؤں گا

— Sheikh Rashid Ahmed (@ShkhRasheed) July 20, 2022

انہوں نے مزید لکھا کہ اکتوبر نومبر میں عام انتخابات کے علاوہ کوئی حل نہیں، پھر کوئی بھی حکومت نہیں کرپائے گا۔