شہر میں جزلان نامی نوجوان کے قتل کیس میں ایڈیشنل سیشن جج نے تینوں ملزمان کی درخواست ضمانت مسترد کردی، جبکہ ملزم فیض محمد اور احسان عرف احسن عدالت سے فرار ہوگئے۔

مدعی کے وکیل کے مطابق ہفتے کو فیصلہ سنتے ہی دونوں ملزمان عدالت سے فرار ہوگئے۔

ملزم حسنین پہلے ہی جیل میں ہے، جبکہ ملزم فیض محمد اور احسان عبوری ضمانت پر تھے۔

عدالت نے گذشتہ سماعت پر وکلا کے دلائل اور تفیتیشی افسر کی رپورٹ کے بعد فیصلہ محفوظ کیا تھا۔

ملزمان نے دوران تفتیش بتایا تھا کہ قتل میں استعمال شدہ ان کا پسٹل دو برس سے غائب تھا۔

تفتیشی افسر کی رپورٹ کے مطابق پسٹل غائب ہونے کی رپورٹ جعلی تھی۔

وکیل مدعی کے مطابق تفتیشی افسر نے بالا حکام کی اجازت سے گھوٹکی میں جا کر رپورٹ چیک کی جو کہ جعلی تھی۔

واضح رہے کہ 18 برس کے جزلان فیصل کو 24 مئی کی رات کو قتل کر دیا گیا تھا۔ انہوں نے ایک موٹر سائیکل سوار کو ریس لگانے سے منع کیا جس کے نتیجے میں معمولی تنازع ہوا اور جزلان فیصل کو گولی مار دی گئی۔