سوشل میڈیا کے ذریعےغیراخلاقی مواد کی تشہیر، ہراسگی اور کردار کشی کی ذریعے شہریوں کی ساکھ خراب کرنے والوں کیخلاف کریک ڈاؤن کا فیصلہ کیا گیا ہے۔

وفاقی وزیر داخلہ کی زیر صدارت اہم اجلاس ہوا جس میں سوشل میڈیا پرشہریوں کی ہراسگی، غیراخلاقی ویڈیوز اپلوڈ کرنے ، بلیک میلنگ اوران کی کردارکشی سے متعلق معاملات کا جائزہ لیا گیا۔

وزیر داخلہ رانا ثنا اللہ نے سوشل میڈیا کے ذریعےغیراخلاقی مواد کی تشہیر، ہراسگی اورکردار کشی کرنے والوں کیخلاف سخت اور فوری کارروائی کیلئے ڈائیریکٹر جنرل ایف آئی اے کو ہدایات جاری کر دیں۔

اجلاس میں پیکا ایکٹ 2016 میں ضروری ترامیم لانے کیلئے ورکنگ گروپ تشکیل دینے کا فیصلہ بھی کیا گیا جبکہ شہریوں کی شکایات کیلئے ایف آئی اے نے رابطہ نمبرز بھی جاری کردئیے۔

رانا ثنا اللہ نے کہا کہ سوشل میڈیا پرتوہین آمیز مواد اور شہریوں کی کردارکشی کے ذریعے ساکھ خراب کرنا کسی صورت قابل قبول نہیں، ایسے جرائم میں ملوث افراد کیخلاف سخت ایکشن لیا جائے گا۔

وزیر داخلہ کا کہنا تھا کہ شہری اپنی شکایات ایف آئی اے کے رابطہ نمبرز پر بھیجیں،شکایات پر بلا تاخیر عملدرآمد کرینگے۔