وزیراعلی پنجاب حمزہ شہباز کا مون سون سیزن اور ممکنہ سیلاب کے خدشے کے پیش نظر تمام انتظامی مشینری کو 24 گھنٹے الرٹ رہنے کا حکم دے دیا۔

وزیراعلی حمزہ شہباز نے سیلاب کے خدشے کے تناظر میں تمام تیاریاں مکمل رکھنے کی ہدایات جاری کرتے ہوئے کہا ہے کہ دریاؤں کے بیڈ کے اندر آبادیوں کا بروقت انخلاء پہلی ترجیح ہونا چاہیے۔

وزیراعلی نے انتظامیہ کو کہا کہ موسم کی صورتحال انتہائی غیر متوقع ہے ان غیر معمولی موسمی حالات کے پیش نظر آپ کی تیاریوں کا لیول بھی غیر معمولی اقدامات کا متقاضی ہے۔

انہوں نے کہا کہ تمام متعلقہ صوبائی اور وفاقی ادارے مربوط اور بہترین کوآرڈینیشن کے تحت فرائض سرانجام دیں۔

حمزہ شہباز نے کہا کہ کسی ناگہانی آفت کی صورت میں محکمہ صحت کے پاس ضروری ادویات کا ہونا بے حد ضروری ہے۔

تاہم ان کا کہنا تھا کہ خصوصاً سانپ کے کاٹنے کے علاج کیلئے ادویات وافر مقدار میں موجود ہونی چاہئیں۔

واضح رہے کہ محکمہ موسمیات نے کہا کہ آئندہ 24 گھنٹے کے دوران پنجاب کے بالائی اور وسطی علاقوں میں بارش برسنے کا امکان ہے۔