اسلام آباد: پاکستان تحریک انصاف (پی ٹی آئی) نے پنجاب اسمبلی کی5مخصوص نشستوں کا نوٹیفکیشن جاری کرنے کا مطالبہ کرتے ہوئے الیکشن کمیشن کو درخواست جمع کرا دی۔

پی ٹی آئی کے رہنماؤں فواد چوہدری، شیریں مزاری اور اسد عمر نے اسلام آباد میں پریس کانفرنس کرتے ہوئے الیکشن کمیشن سے پنجاب کی 5 مخصوص نشستوں پر تحریک انصاف کی جانب سے نامزد لوگوں کا نوٹیفکیشن جاری کرنے کا مطالبہ کیا۔

فواد چوہدری نے کہا کہ الیکشن کمیشن کو باقاعدہ درخواست جمع کرا دی ہے۔

پی ٹی آئی رہنماؤں نے کہا کہ 20 سیٹوں پر الیکشن کے بعد حمزہ کی وزارت اعلیٰ بچنی نہیں ہے، ملک میں سیاسی استحکام ایسے نہیں آسکتا کہ اپنے بیٹے کو جعلی وزیرِ اعلیٰ بنا دیں۔

پی ٹی آئی رہنماء اسد عمر کا کہنا تھا کہ تمام مسائل کا حل فوری صاف اور شفاف انتخابات میں ہے ۔

پی ٹی آئی رہنما شیری مزاری کا کہنا تھا الیکشن کمیشن کے فیصلے قانون کے مطابق نہیں، چیف الیکشن کمشنر اور الیکشن کمیشن فوری طور پر استعفی دیں۔