کراچی :پی آئی اے کا حج آپریشن جاری ہے، کراچی سے قومی ایئرلائن کی پہلی حج پروازپی کے 743 آج صبح 291 عازمین حج کو لے کر مدینہ منورہ روانہ ہوگئی۔

کراچی ایئرپورٹ پر پی آئی اے پریسشن انجینرنگ کمپلیکس (PEC) کے ڈائریکٹر ایئر وائس مارشل عرفان ظہیر نے عازمین حج کو رخصت کیا اور پھولوں کے ہار پہنائے۔

اس موقع پر عازمین حج کو پی آئی اے کی جانب سے چھتریاں بھی تقسیم کی گئیں جبکہ حجاج کرام سے پاکستان کی سلامتی اور پی آئی اے کی ترقی کیلئے خصوصی دعاؤں کی درخواست کی گئی ہے۔

پی آئی اے کا حج آپریشن جاری کراچی سے پہلی حج پرواز روانہ#AajNews #hajj2022 pic.twitter.com/N8eIBOhUqI

— Aaj News (@Aaj_Urdu) June 8, 2022

ذرائع کے مطابق وزیر ہوابازی خواجہ سعد رفیق کی ہدایات پر عازمین حج کو ہر ممکن سہولیات فراہم کی جارہی ہیں۔

سی ای او پی آئی اے عامر حیات حج آپریشن کی خود نگرانی کر رہے ہیں جبکہ ایئر پورٹ پرعازمین حج کی معاونت کیلئے خصوصی ٹیم مصروف رہی۔

آج صبح کراچی سے پی آئی اے کی پہلی قبل از حج پرواز کے موقع پر وزیر اعلیٰ سندھ کے مشیر برائے مذہبی امور زکوٰۃ و عشر فیاض علی بٹ، پی آئی اے سٹیشن مینیجر احمد عالم ، ٹکٹ آفس مینیجر مظہر زرداری، ایئر لائن اور CAA کے سینئر افسران بھی موجود تھے۔

واضح رہے کہ پی آئی اے 5 بڑے شہروں سے اسلام آباد، کراچی، لاہور، ملتان اور کوئٹہ سے عازمین کو حجاز مقدس پہنچارہی ہے، اس سلسلے میں اب تک تقریبا 2,000 سے زائد عازمین حج کو سعودی عرب پہنچایا جاچکا ہے۔

پی آئی اے کا قبل از حج آپریشن 3 جولائی کو اختتام پزیر ہوگا جبکہ بعد از حج پروازیں 14 جولائی سے شروع ہوں گی اور 13 اگست تک جاری رہیں گی۔