وفاقی وزیر داخلہ رانا ثنا اللہ نے کہا کہ عمران خان گرفتار ہو جائے تو یہ کچھ نہیں کریں گے۔

آج نیوز کے پروگرام “ فیصلہ آپ کا“ میں خصوصی گفتگو کرتے ہوئے وزیر داخلہ نے کہا کہ جب خان صاحب نے ایک جرم کا ارتکاب کیا ہے، تو انہیں گرفتار کرنا چاہیئے اور اگر عمران خان گرفتار ہو جائے تو گارنٹی دیتا ہوں کوئی خود کش حملہ نہیں کرے گا۔

انہوں نے کہا کہ عمران خان نے ایک ماہ تک مہم چلائی، ان کی تقاریر میں گالیاں اور غدار قرار دینے کےعلاوہ کچھ نہیں، عمران خان کو چاہیئےکہ بیٹھ کر معاملات حل کریں۔

وزیر داخلہ کا کہنا تھا کہ اب کوئی بھی لانگ مارچ اسلام آباد کی طرف دو ہی صورتحال میں بڑھ سکتا ہے جب ریاست خود چاہے یا پھر سپریم کورٹ اس کی اجازت دے۔

رانا ثنا اللہ نے کہا کہ عمران خان کو گرفتار کرنے کے ارادے میں پختا ہوں، پہلی بار ہوا ہے کہ انقلاب نے بھی اپنی ضمانت کرالی، اگر عدالت نے ان کی ضمانتیں منسوخ کی تو ہم انہیں گرفتار کریں گے۔

وزیر داخلہ کا مزید کہنا تھا کہ ہم عدالت میں جاکر اپنا کیس پیش کریں گے، یہ دارالحکومت پر حملہ آور ہوئے ہیں، کابینہ سے مقدمہ درج کرنے کی درخواست کی ہے، اگر یہ مقدمہ درج ہوا تو خان صاحب فارغ ہوجائیں گے کیونکہ ہمارے پاس ان کے خلاف ناقابل تردید ثبوت ہیں۔