متحدہ قومی موومنٹ پاکستان (ایم کیو ایم) کے کنوینئر ڈاکٹر خالد مقبول صدیقی کہتے ہیں کہ نمبرز پورے ہونا کوئی انہونی بات نہیں ہے۔

آج ٹی وی کے پروگرام 'روبرو شوکت براچہ کے ساتھ' میں گفتگو کرتے ہوئے خالد مقبول کا کہنا ہے کہ نمبرز پورے ہونا کوئی انہونی بات نہیں ہے، تمام تر طریقہ واردات کے باوجود 10 سیٹوں کا فرق ہے، 2018 کےالیکشن میں عبوری حکومت تھی لیکن بینفشری پاکستان تحریک انصاف تھی۔

ایم کیو ایم رہنما نے مزید کہا کہ موروثی اقتدار کے ساتھ سب کو سمجھوتا کرنا پڑتا ہے، خط کے معاملے پر عدالتی کمیشن بننا چاہئے، وزیراعظم کو ایسا اقدام اٹھانا چاہئے کہ سب کو اعتماد ہو.

انہوں نے مزید کہا کہ مقتدر حلقوں کی جانب سے ہمیں پیغام ملا ہے کہ سیاست میں مداخلت نہیں کریں گے، ان کی اپنی ہی ٹیم چلی گئی تو ہمیں دوش نہ دیں، سازش ہوتی تو دفاعی ادارے ایکشن لیتے، ادارے ان کی پہلے بھی مدد کرتےرہے اور ہمیں بھی سمجھاتے رہے ہیں۔

خالد مقبول نے کہا کہ کراچی میں شب خون مارا گیا ہے، وزیراعظم لاپتہ افراد کے حوالے سے کمیشن تک نہ بنواسکے، دو ڈھائی ہزار لوگوں سےجیلیں بھری ہوئی ہیں، پہلے ہی کہہ دیتے کہ میرے بس میں نہیں ہے۔

اس کے علاوہ ان کا کہنا ہے کہ ایسا لگ نہیں رہا کہ پرویزالہی وزیراعلی بن جائیں گے، کارڈز کا گھر جب گرنا شروع ہوتا ہے گرتا جاتا ہے۔