کھیتھولک عیسائیوں کے مذہبی پیشوا پوپ فرانسس نے روس سے یوکرین میں شہریوں کے قتلِ عام کو روکنے کی اپیل کردی۔

برطانوی خبر رساں ادارے ڈیلی میل کی رپورٹ کے مطابق 85 سالہ پوپ فرانسس کا کہنا تھا کہ بچوں اور میٹرنٹی اسپتال پر بمباری کرنا وحشیانہ عمل ہے، روس کو یوکرینی شہریوں کا قتلِ عام بند کردینا چاہیئے اس سے پہلے کہ آبائی شہر قبرستانوں میں تبدیل ہوں۔

انہوں نے مزید کہا کہ یوکرین اور روس کے درمیان جاری تنازعات کے دوران ماریوپول شہدا کا شہر بن چکا ہے، معصوم بچوں اور غیر مسلح شہریوں کی قتل و غارت فوری بند کی جائے۔

پوپ فرانسس نے مزید کہا کہ دونوں ممالک کو مذکرات پر حقیقی توجہ مرکوز کرنی چاہیئے، انسانی ہمدردی کی راہداریوں کو موثر اور محفوظ بنانا چاہیئے۔