پی ڈی ایم کے سربراہ مولانا فضل الرحمان نے کہا ہے کہ حکومت کے غبارے سے ہوا نکل چکی ہے، اسٹیبلشمنٹ عمران حکومت کے احکامات ماننے کی پابند نہیں ہے۔

ڈیرہ اسماعیل خان میں میڈیا سے گفتگو کرتے ہوئے انہوں نے کہا کہ شیخ رشید حکومت کے ساتھ چٹان نہیں، رائی کے پہاڑ کی طرح کھڑا ہے۔

انہوں نے کہا کہ بیرونی ایجنڈے کے ساتھ مسلط عمرانی حکومت کی اصلیت حکومت کے قیام سے قبل ہی آشکار کردی تھی اور تحریک عدم اعتماد کے بعد الیکشن کمیشن وزیراعظم کی انتخابی اجتماعات میں شرکت اور انتخابی رولز کی خلاف ورزی پر جرمانوں کی بجائے عملی اقدامات اٹھائے۔

انہوں نے مزید کہا کہ نواز شریف جب چاہیں وطن واپس آسکتے ہیں، اسٹیبلشمنٹ پارٹی نہ بدلے، اپنے کام سے کام رکھے۔

ان کا کہنا تھا کہ عمران خان اپنے اتحادیوں کا اعتماد کھو چکا ہے، وہ اپنی حرکتوں کے باعث عوام کے سامنے بے نقاب ہورہا ہے، ہم نے 10سال قبل ہی کہہ دیا تھا کہ عمران خان نے نمائشی لبادہ اوڑھ رکھا ہے۔

انہوں نے مطالبہ کیا کہ الیکشن کمیشن عوامی عہدہ رکھنے والے ذمہ داران کی انتخابی مہم میں شمولیت پر محض جرمانوں تک محدود نہ رہے بلکہ عملی اقدامات اٹھائے۔