لاہور: مسلم لیگ (ن)کے صدر اور قومی اسمبلی میں اپوزیشن لیڈر شہباز شریف نے رمضان شوگر ملز کیس میں بریت کی درخواست احتساب عدالت میں دائر کردی۔

قائد حزب اختلاف شہباز شریف نے احتساب عدالت میں بریت کی درخواست دائر کرتےہوئے مؤقف اختیار کیا کہ بطور وزیر اعلیٰ پنجاب عوام کے اربوں روپے بچائے، میرے اقدامات سے میرے خاندان کو نقصان پہنچا۔

درخواست میں مزید کہا گیا کہ رمضان شوگر مل میں شیئر ہولڈر نہیں ہوں اور ڈائریکٹر بھی نہیں ہوں جبکہ اپنی جائیداد بھی میں نے بچوں میں تقسیم کر دی ہے۔

شہباز شریف نے نیب کی جانب سے لگائے گئے الزامات کے حوالے سےدرخواست میں کہا کہ نیب ابھی تک کوئی الزام ثابت نہیں کر سکا، استدعا ہے کہ عدالت ریفرنس سے بری کرنے کا حکم دے۔