کراچی سمیت سندھ بھر میں ڈھائی ماہ بعد سی این جی اسٹیشنز آج سے کھل گئے، سی این جی اسٹیشزیکم دسمبر 2021 کو بند کئے گئے تھے۔

سوئی سدرن گیس کمپنی کی ہدایات کی روشنی میں کراچی سمیت سندھ بھر میں سی این جی اسٹیشنز دوبارہ فعال ہوگئے۔

ایس ایس جی سی کے مطابق آج صبح 8 بجے سے صرف آر ایل این جی پر چلنے والے سی این جی اسٹیشنز دوبارہ فعال ہوئے ہیں۔

سی این جی اسٹیشنز کھلنے کے بعد پبلک ٹرانسپورٹ اور کمرشل گاڑیوں کی لمبی لمبی قطاریں اسٹیشنز پر دیکھی گئی ہیں۔

سوئی سدرن کمپنی (ایس ایس جی سی)نے گیس کی قلت کے باعث ڈھائی ماہ قبل سی این جی اسٹیشنز کو گیس کی فراہمی بند کردی تھی۔

ایس ایس جی سی کی جانب سے ڈھائی ماہ سی این جی بند کئے جانے کا فیصلہ طلب و رسد کا فرق بڑھنے اور گھریلو صارفین کی ضروریات پوری کرنےکیلئے کیا گیا تھا۔

اس حوالے سے گفتگو کرتے ہوئے رہنما آل پاکستان سی این جی ایسوسی ایشن غیاث پراچہ نے کہا تھا کہ سندھ میں ڈھائی ماہ کیلئے سی این جی اسٹیشنز بند کرنا ظلم ہے۔