لاہورہائیکورٹ نے پنجاب میں ڈینگی ادویات کی مہنگے داموں خریداری کیخلاف درخواست پر حکومت پنجاب کو نوٹس جاری کرتے ہوئے جواب طلب کرلیا۔

لاہورہائیکورٹ کے جسٹس جواد حسن نے ڈینگی ادویات کی مہنگےداموں خریداری کیخلاف درخواست پر سماعت کی۔

درخواست گزار نےعدالت کو بتایا کہ ڈینگی کے نام پر 10روپے والی دوائی 10ہزار کی خریدی گئی،ڈینگی ادویات کی خریداری میں بڑے پیمانے پرکرپشن کی گئی، کرپشن کا معاملہ ملی بھگت کا نتیجہ ہے نیب نے درخواست کےباوجود کارروائی نہیں کی، عدالت قانون کے برعکس ڈینگی ادویات کی خریداری کے ذمہ داروں کخلابف کارروائی کے احکامات صادر کرے۔

عدالت نے ریمارکس دئیے کہ پیپرا نے ادویات کی قیمتوں کا تعین کیوں نہیں کیا آگاہ کیاجائے، ادویات کی خریداری پیپرا رولز سے ہٹ کر کیسے کی گئی۔

لاہور ہائیکورٹ نے پنجاب حکومت سے جواب طلب کرتے ہوئے مزید سماعت 14جنوری تک ملتوی کردی۔