کراچی: وزیراعلیٰ سندھ سید مراد علی شاہ نے کہا ہے کہ صوبے میں بلدیاتی انتخابات فروری یا مارچ 2022 میں ہونے کا امکان ہے۔

وزیراعلیٰ گڑھی خدا بخش میں سابق وزیراعظم بے نظیر بھٹو کی قبر پر پھولوں کی چادر چڑھانے کے بعد صحافیوں سے گفتگو کر رہے تھے جہاں انہوں نے بلدیاتی انتخابات کے وقت کا اشارہ دیا۔

مراد شاہ نے کہا کہ وہ سندھ میں بلدیاتی انتخابات کے بارے میں الیکشن کمیشن سے بات کریں گے۔

انہوں نے کہا کہ پیپلز پارٹی نے ایم کیو ایم کو اتحادی بنایا کیونکہ وہ سندھ میں گورننس کو بہتر کرنا چاہتی تھی۔

وزیراعلیٰ نے حال ہی میں افتتاح ہونے والی گرین لائن بی آر ٹی بس منصوبے پر اپنے خیالات کا اظہار کرتے ہوئے کہا کہ صوبائی حکومت نے اس کے لیے فنڈز بھی فراہم کیے ہیں۔

انہوں نے کہا کہ اس منصوبے کے لیے زمین سندھ حکومت نے فراہم کی ہے کیونکہ اسے صوبے کے عوام کی فلاح و بہبود کے لیے استعمال کیا جانا ہے۔