اسلام آباد:چیئرمین نیب جسٹس(ر)جاوید اقبال نے کہا کہ احتسابی عمل سے کسی کو خوفزدہ ہونے کی ضرورت نہیں ، ہمارا ایجنڈا صرف ملکی ترقی و خوشحالی کیلئے سازگار ماحول فراہم کرنا ہے۔

چیئرمین نیب جسٹس (ر)جاوید اقبال نے چیئرمین سینیٹ صادق سنجرانی سےملاقات میں نیب کی سالانہ رپورٹ 2020پیش کی۔

چیئرمین نیب نے ملک میں جاری احتسابی عمل کےمتعلق تفصیل سے آگاہ کیااور احتسابی عمل کوزیادہ شفاف اورمؤثربنانے کیلئے اٹھائے جانے والے اقدامات کے بارے میں بریف کیا۔

اس موقع پر چیئرمین سینیٹ صادق سنجرانی کا کہنا تھا کہ احتساب کے عمل میں شفافیت اور غیر جانبداری کو ہر صورت برقرار رکھا جائے ،احتسابی عمل کے نتیجے میں تاجر اور کاروباری طبقے کے ہراساں ہونے کے تاثر کی نفی ہونی چاہیئے۔

چیئرمین نیب جسٹس (ر)جاوید اقبال نے کہا کہ ارکان پارلیمنٹ اورکاروباری طبقےکی مثبت تجاویز کا خیر مقدم کرتے ہیں،کرپشن کے خاتمے سے تاجروں اور سرمایہ کاروں کو بہترماحول میسرہوگا، احتسابی عمل سے کسی کو خوفزدہ ہونے کی ضرورت نہیں ہے، ہمارا ایجنڈا صرف پاکستان کی ترقی و خوشحالی کیلئے سازگار ماحول فراہم کرنا ہے۔