لاہور کی مقامی عدالت نے ریاست مخالف بیان سے متعلق کیس میں مسلم لیگ (ن)کے رکن قومی اسمبلی جاوید لطیف کو 14روزہ جوڈیشل ریمانڈ پر جیل بھیج دیا، عدالت نے ملزم کو 26مئی کو طلب کرلیا۔

جوڈیشنل مجسٹریٹ مجتبی حسن نے ریاست مخالف بیان سے متعلق کیس کی سماعت کی،لیگی رکن قومی اسمبلی جاوید لطیف کو عدالت کے روبرو پیش کیا گیا جہاں ان کی حاضری مکمل کی گئی جبکہ تفتیشی افسر کی جانب سے رپورٹ عدالت میں پیش کی گئی۔

جاوید لطیف نے عدالت کے روبرو اپنے بیان میں کہا کہ گزشتہ 15 دن سے ان کے ساتھ بہت برا سلوک کیا جا رہا ہے، چند لوگ پالیسی بنائیں گے تو پھر عوام کے حقوق سلب ہی ہوں گے۔

عدالت نے جاوید لطیف کو 14روزہ جوڈیشل ریمانڈ پر جیل بھیجنے کا حکم دیتے ہوئے 26مئی کو دوبارہ طلب کرلیا۔