اسلام آباد:وزیراعظم عمران خان اور وزیراعلیٰ پنجاب عثمان بزدار نے ایسٹر کے موقع پر مسیحی برادری کو مبارکباد دیتے ہوئے نیک خواہشات کا اظہار کیا ہے۔

ملک بھر میں مسیحی برادری آج ایسٹر کی خوشیاں منا رہی ہے، حکومت نے تقریبات میں ایس اوپیزکی پابندی کرنے کی ہدایت کردی۔

وزیراعظم نے سماجی رابطے کی ویب سائٹ ٹویٹر پر اپنے ٹویٹ میں ایسٹر کےموقع پرمسیحی برادری کومبارکباد دیتے ہوئے کہا کہ ہمارے تمام مسیحی شہریوں کوایسٹرکی خوشیاں مبارک ہو۔

ہمارے تمام مسیحی شہریوں کو ایسٹر کی خوشیاں مبارک۔

— Imran Khan (@ImranKhanPTI) April 4, 2021

وزیراعلیٰ پنجاب عثمان بزدار کی مسیحی برادری کو ایسٹر کی مبارکباد

دوسری جانب وزیراعلیٰ پنجاب سردار عثمان بزدار نے بھی مسیحی برادری کو ایسٹر کی مبارکباد دیتے ہوئے کہا کہ مسیحی برادری کی خوشیوں میں برابر کے شریک ہیں،ایسٹر کا حقیقی پیغام دوسروں کی خوشیاں بانٹنا ہے ،قیام پاکستان سے تعمیر پاکستان تک کی مسیحی برادری کا کردار قابل ستائش ہے۔

وزیراعلیٰ پنجاب نے مزید کہا کہ پاکستان کے دفاع کیلئے مسیحی برادری نے گرانقدرخدمات سرانجام دی ہیں جبکہ پاکستان کی تعمیر و ترقی کیلئے تمام اقلیتوں کو ساتھ لے کر چلیں گے، پنجاب میں اقلیتی برادری کی فلاح و بہبود کیلئے اہم اقدامات کئے جا رہے ہیں۔

عثمان بزدار نے مسیحی برادی سے اپیل کی کہ کورونا کی تیسری لہر کے پیش نظر ایسٹر پر ماسک ضرور پہنیں اور سماجی فاصلہ اختیار کریں، ایسٹر کی خوشیوں میں دوسروں کو شامل کرنے کا بہترین طریقہ ماسک کا استعمال ہے۔