وزیراعلیٰ پنجاب مریم نواز نے صوبے بھر میں کم از کم ماہانہ اجرت کا نفاذ یقینی بنانے کا حکم دے دیا جبکہ انہوں نے پنجاب بھر میں لیبر کالونیاں بنانے کے لیے پلان طلب کرلیا اور سوشل سیکیورٹی اسپتالوں کی ری ویمپنگ کا بھی حکم دے دیا۔
وزیراعلیٰ پنجاب مریم نواز کی زیر صدارت خصوصی اجلاس ہوا جس میں صوبائی وزیر محنت فیصل ایوب کھوکھر اور دیگر شریک ہوئے، اجلاس میں مزدوروں کی فلاح و بہبود کے لیے اہم فیصلے کیے گئے۔
دوران اجلاس وزیراعلی مریم نواز پنجاب بھر میں کم از کم اجرت کا نفاذ یقینی بنانے کا حکم دیتے ہوئے کہا کہ پنجاب بھر میں ورکرز کو کم از کم 37 ہزار ماہانہ ادائیگی یقینی بنائی جائے۔
وزیراعلیٰ مریم نواز نے پنجاب بھر میں لیبرکالونیاں بنانے کے لیے پلان طلب کرلیا اور صوبہ بھر میں سوشل سیکیورٹی اسپتالوں کی ری ویمپنگ کا بھی حکم دے دیا، لاہور اور راولپنڈی، اسلام آباد میں پری سکیننگ کے لیے مریم نواز ویلنس سینٹر بنیں گے جبکہ مریم نواز ویلنس سینٹر میں مریضوں کو اسکریننگ کے بعد بڑے اسپتال میں ریفر کیا جائے گا۔
اجلاس میں لاہورڈیفنس روڈ پر 200 بیڈز کے رحمت اللعالمین کارڈیالوجی سینٹر بنانے کا اصولی فیصلہ ہوا جبکہ رحیم یار خان میں 50 بیڈز کے نئے سوشل سکیورٹی ہسپتال کی اصولی منظوری دی گئی، وزیراعلیٰ پنجاب نے مزدوروں کی فلاح وبہبود کے لیے لیبرلاز میں ترامیم کی بھی ہدایت کی۔
دوران اجلاس گفتگو کرتے ہوئے وزیراعلیٰ پنجاب مریم نواز کا کہنا تھا کہ محنت کش اللہ کے دوست ہیں،اللہ کے دوستوں کو ناراض نہیں کرسکتے، پنجاب کو مزدوروں کی فلاح وبہبود کے حوالے سے مثالی صوبہ بنانے کا عزم رکھتے ہیں۔
مریم نواز نے مزید کہا کہ مزدور کی اجرت،علاج معالجہ، بہترروزگار اور اپنی چھت کی فراہمی حکومت کی ذمہ داری ہے، کوئی مزدور بھوکا نہ سوئے، کسی کو دکھ اورپریشانی نہ ہو، مزدوروں کے بچوں کیلئے اعلیٰ تعلیم کے بہتر مواقع مہیا کررہے ہیں۔
