وزیر اطلاعات سندھ، شرجیل انعام میمن نے کہا ہے کہ سیہون حادثے پر پنجاب حکومت نے سیاست کرنے کی کوشش کی، وفاق میں سب سے زیادہ حکومت مسلم لیگ ن کی رہی ہے، اگر روڈز مکمل نہیں ہوئے تو یہ ن لیگ کی وفاقی حکومت کی نااہلی ہے، پنجاب کی وزیر اطلاعات جب شعلہ بیانی کرتی ہیں تو یہ سمجھ لیں کہ جواب بھی آئے گا، ہم جھوٹی باتیں نہیں کریں گے، ہم صرف آپ کو سچ بتائیں گے۔

شرجیل میمن نے پیر کو میڈیا سے گفتگو کرتے ہوئے کہا کہ سندھ اسمبلی کے اجلاس میں گورنر کی جانب سے اعتراضات کے باوجود جو بلز واپس کیے گئے تھے، وہ سب جلد منظور کر لیے جائیں گے۔

انہوں نے بتایا کہ کابینہ میں فیصلہ کیا گیا ہے کہ سرکاری ملازمتوں میں عمر میں 5 سال کی رعایت دی جائے گی، جس سے سندھ بھر کے نوجوانوں میں امید کی ایک نئی لہر پیدا ہوئی ہے۔

وزیر اطلاعات سندھ نے سیہون روڈ پر انسانی جانوں کے ضیاع کا ذکر کرتے ہوئے کہا کہ سندھ حکومت نے اس روڈ کے لیے 7 ارب روپے دیے تھے لیکن اب تک اس پر کوئی کام نہیں ہوا۔ انہوں نے الزام عائد کیا کہ ن لیگ کی نااہلی کی وجہ سے قومی شاہراہوں پر حادثات پیش آ رہے ہیں۔

ان کا کہنا تھا کہ وفاق میں سب سے زیادہ حکومت مسلم لیگ ن کی رہی ہے اور اگر روڈز مکمل نہیں ہوئے تو یہ ان کی وفاقی حکومت کی نااہلی ہے۔

انہوں نے پنجاب کی وزیر اطلاعات کو تنقید کا نشانہ بناتے ہوئے کہا کہ جب وہ شعلہ بیانی کرتی ہیں تو ان کے جواب میں صرف سچ بولا جائے گا، جھوٹ کا سہارا نہیں لیا جائے گا۔

شرجیل میمن نے کہا کہ پیپلز پارٹی کا سندھ میں حقیقی مینڈیٹ ہے اور عوام نے ہمیشہ پیپلز پارٹی کی حکومتی کارکردگی کو سراہا ہے۔

انہوں نے کہا کہ پی ٹی آئی کی سیاست میں ملک کو نقصان پہنچانے کی کوششیں شامل ہیں اور آئی ایم ایف سے مذاکرات کے دوران پی ٹی آئی کی طرف سے اس کا آغاز کیا گیا تھا۔

وزیر اطلاعات سندھ نے مزید کہا کہ بلاول بھٹو نے ہمیشہ پاکستان کے مفاد میں فیصلے کیے ہیں اور 9 مئی کا انتشار عمران خان کی سازش تھی۔ انہوں نے خیبر پختونخوا کی حکومت پر تنقید کرتے ہوئے کہا کہ وہاں ڈر اور خوف کا ماحول ہے، اور 5 بجے کے بعد لوگ گھروں سے باہر نہیں نکلتے۔

انہوں نے یہ بھی کہا کہ پی ٹی آئی کی حکومت کی 15 سالہ کارکردگی کے باوجود خیبر پختونخوا کے لوگ ملازمتوں کے لیے سندھ آتے ہیں، اور یہ اس بات کا ثبوت ہے کہ وہاں عوام کو ریلیف نہیں ملا۔

شرجیل میمن نے اس بات کا بھی عندیہ دیا کہ پیپلز پارٹی نے کبھی بلیک میلنگ کی سیاست نہیں کی اور نہ ہی ن لیگ کا ساتھ شوق میں دیا بلکہ جمہوریت اور پارلیمنٹ کے حق میں غیرمشروط حمایت کی۔ انہوں نے کہا کہ سندھ نے ہمیشہ ن لیگ اور پی ٹی آئی کو مسترد کیا ہے۔