اسرائیلی فوج نے بیرون ملک سفر کرنے والے اپنے اہلکاروں کو خبردار کیا ہے کہ انہیں بیرون ملک جنگی جرائم کے الزام میں گرفتاری کا سامنا کرنا پڑ سکتا ہے۔
غیر ملکی میڈیا رپورٹس کے مطابق، اسرائیلی فوج نے غزہ میں ممکنہ جنگی جرائم کی تحقیقات کے دوران ایک فوجی کے برازیل فرار ہونے کے بعد اس ممکنہ خطرے سے اپنے فوجیوں کو آگاہ کیا ہے۔
اسرائیل کی وزارت خارجہ نے اتوار کے روز کہا کہ اس نے سابق فوجی کو بحفاظت تجارتی پرواز سے برازیل سے نکلنے میں مدد کی تھی جب اس نے گزشتہ ہفتے ”اسرائیل مخالف عناصر“ کی تحقیقات کا مطالبہ کیا تھا۔ اس نے اسرائیلیوں کو ان کی فوجی خدمات کے بارے میں سوشل میڈیا پر پوسٹ کرنے سے خبردار کیا۔
حماس کی قید میں موجود اسرائیلی خاتون فوجی نے نیتن یاہو کو کھری کھری سنادی
رپورٹس کے مطابق، غزہ جنگ میں شریک اسرائیلی فوجی یوآل وگدانی کے خلاف جنگی جرائم کے الزامات عائد کیے گئے تھے اور اسرائیل میں اس کے خلاف تحقیقات جاری تھیں، تاہم اس دوران وہ برازیل فرار ہوگیا۔
فلسطینیوں کے حقوق کے لیے بیلجیئم کی ایک تنظیم ’ہند رجب فاؤنڈیشن‘ نے اس معاملے کو برازیل کی عدالت میں اٹھایا جس پر گزشتہ ہفتے عدالت نے پولیس کو اسرائیلی فوجی سے تفتیش کرنے کے احکامات جاری کیے۔
ہند رجب فاؤنڈیشن، جس کا نام غزہ میں قتل ہونے والی 5 سالہ فلسطینی لڑکی کے نام پر رکھا گیا ہے، نے کہا کہ برازیلی حکام نے اس فوجی سے تفتیش شروع کی ہے جب اس نے ویڈیو فوٹیج، جغرافیائی محل وقوع کے اعداد و شمار اور تصاویر کی بنیاد پر شکایت درج کرائی تھی جس میں اسے شہریوں کے گھروں کو انہدام میں حصہ لیتے ہوئے دکھایا گیا تھا۔
سال 2024 میں کتنے اسرائیلی فوجیوں نے خودکشی کی؟
فاؤنڈیشن کی جانب سے نمائندہ وکیل مائرہ پنہیرو نے اس حوالے سے برازیلی میڈیا کو بتایا ہے کہ معاہدہ روم کا دستخط کنندہ ہونے کی حیثیت سے برازیل کو اس قانون میں فراہم کردہ جنگی اور انسانیت کے خلاف جرائم اور نسل کشی میں ملوث افراد کے خلاف تحقیقات کرنے اور انہیں سزا دینے کا اختیار حاصل ہے اور وہ اس کا پابند بھی ہے۔
دوسری جانب، اسرائیل ان ممالک کے ساتھ رابطے میں ہے جہاں اس کے فوجیوں کے خلاف شکایات درج کی گئی ہیں، اسرائیلی حکومت ایسی تمام تحقیقات کو روکنے کی کوششوں میں مصروف ہے جن میں اس کے فوجیوں کی گرفتاری کا خدشہ موجود ہے۔
اسرائیلی فوج شام میں داخل ہوگئی
میڈیا رپورٹس کے مطابق، برازیل میں اسرائیلی سفارتخانے نے اسرائیلی فوجی یوآل وگدانی کے برازیل سے فوری محفوظ انخلا کی تصدیق کردی ہے، جس پر ہند رجب فاؤنڈیشن نے سخت احتجاج کیا ہے اور اسرائیلی حکومت کو انصاف کی راہ میں رکاوٹ بننے کا ذمہ دار قرار دیا ہے۔
اسرائیل کو غزہ میں حماس کے خلاف اپنی جنگ پر شدید بین الاقوامی تنقید کا سامنا ہے، بین الاقوامی فوجداری عدالت نے وزیر اعظم بنجمن نیتن یاہو اور ان کے سابق وزیر دفاع کے وارنٹ گرفتاری جاری کیے ہیں۔ عالمی عدالت انصاف نسل کشی کے الزامات کی الگ سے تحقیقات کر رہی ہے۔
برازیل کے مقدمے نے یہ امکان پیدا کیا کہ درجے کے درجے کے اسرائیلی فوجیوں کو بیرون ملک رہتے ہوئے بھی قانونی چارہ جوئی کا سامنا کرنا پڑ سکتا ہے۔
