بلوچستان کے علاقے ضلع کیچ میں تلور کا شکار کھیلنے والے عرب شیوخ کے قافلے پر بم حملہ ہوا ہے، دھماکے کے نتیجے میں سیکورٹی پر مامور 2 اہلکار شہید جبکہ 4 زخمی ہوگئے۔

مقامی لیویز ذرائع کے مطابق واقعہ دشت کھڈان زیریں بک کے مقام پر پیش آیا جو گوادر اور تربت کے درمیانی علاقے میں واقع ہے، جہاں عرب شیوخ شکار کھیلنے کے بعد اپنے کیمپ کی جانب جا رہے تھے۔

حملے میں تمام عرب شیوخ محفوظ رہے تاہم سیکیورٹی پر مامور 2 اہلکار شہید جبکہ 4 زخمی ہوگئے، جنہیں فوری طور پر تربت منتقل کردیا گیا۔

لیویز ذرائع نے مزید بتایا کہ عرب شیوخ بلوچستان کے مختلف علاقوں میں تلور کے شکار کے لیے مختصر قیام کے لیے آتے ہیں اور شکار کھیل کر واپس چلے جاتے ہیں۔