سندھ میں کچے کے علاقے میں ڈاکوؤں کی پولیس موبائل پر فائرنگ سے 2 اہلکار شہید ہوگئے، خیبر پختنونخوا کے شہر بنوں کے علاقے تھانہ احمد زئی کی حدود سے ہیڈ کانسٹیبل کی لاش ملی۔

سندھ کے شہر کندھ کوٹ کے علاقے گڑھی تیغو میں ڈاکوؤں نے پولیس موبائل پر حملہ کر دیا، فائرنگ کے نتیجے میں 2 پولیس اہلکار الطاف بروہی اور عبدالقادر کلادی شہید ہوگئے۔

ایس ایس پی بشیر احمد بروہی نے واقعہ کی تصدیق کرتے ہوئے کہا کہ واقعہ شکارپور کی حدود میں پیش آیا۔ کچے کے علاقے میں بدامنی کے باعث پولیس اہلکاروں کی شہادتیں ہو رہی ہیں۔

بشیر احمد بروہی نے مزید کہا کہ شہید کی موت قوم کی حیات ہے، دونوں شہید اہلکاروں کے اہل خانہ کے غم میں برابر کے شریک ہیں۔

دوسری جانب خیبر پختنو نخوا کے شہر بنوں کے علاقے تھانہ احمد زئی کی حدود سے ہیڈ کانسٹیبل کی لاش برآمد ہوئی ہے، جسے فائرنگ کرکے شہید کیا گیا۔

پولیس حکام کے مطابق ہیڈ کانسٹیبل کی لاش کو پوسٹ مارٹم کیلئے اسپتال منتقل کر دیا گیا ہے۔