اسرائیلی فوج کے لبنان کے مشرقی علاقوں میں فضائی حملے، بیروت میں 4 طاقتور ترین میزائل داغ دیے، 8 منزلہ عمارت پر بمباری سے 20 افراد شہید، 66 زخمی ہوگئے، اسرائیل نے شام اور لبنان کی سرحد پر جوسیہ کراسنگ کو بھی نشانہ بنایا۔

لبنان میں شہدا کی تعداد 3677 تک جاپہنچی ہے، حزب اللہ نے اسرائیلی حملوں کے خلاف جوابی کارروائی کرتے ہوئے لبنان سے تل ابیب اور حیفا میں 30 راکٹ فائر کیے ہیں ۔

غزہ میں اسپتال و مساجد بھی اسرائیلی فوج کے نشانے پر ہیں ، مزید 38 فلسطینی شہید ہوگئے ہیں، صیہونی فوج نے نصیرات کی الفاروق مسجد اور کمال عدوان اسپتال پر حملے کیے، 24 گھنٹے میں بمباری سے 120 افراد شہید جبکہ 205 زخمی ہوگئے۔

اسرائیل کی بمباری سے 62 لبنانی شہری شہید

صیہونی فوج کے حملوں میں شہدا کی مجموعی تعداد 44 ہزار 176 ہوگئی، اسرائیلی بمباری میں ایک یہودی خاتون یرغمالی ہلاک ہوگئی ، جس کی حماس نے تصدیق کردی ہے۔

اسرائیلی دارالحکومت تل ابیب میں ایک بار پھر شہری سڑکوں پر نکل آئے ہیں، انہوں نے یرغمالیوں کی واپسی کے لیے حکومت سے فوری مذاکرات کا مطالبہ کیا ہے۔