وفاقی وزیر اطلاعات عطاء اللہ تارڑ کا کہنا ہے کہ تحریک انتشار کے احتجاج کا مقصد ملک میں فساد پھیلانا ہے، پی ٹی آئی احتجاج کیلئے سرکاری وسائل استعمال کرتی ہے۔
عطاء تارڑ نے اسلام آباد میں میڈیا سے گفتگو کرتے ہوئے کہا کہ قانون ہاتھ میں لینے والوں سے سختی سے نمٹا جائے گا، سرکاری افسران کسی سیاسی سرگرمی میں حصہ نہیں لے سکتے، ملوث ہونے پر افسران کے خلاف سخت سے سخت کارروائی ہوگی۔
انہوں نے کہا کہ اسلام آباد میں کسی احتجاج کی اجازت نہیں ہوگی، قانون پر مکمل طور پر عمل کریں گے اور کروائیں گے۔
ان کا کہنا تھا کہ پہلے چینی صدر کے دورے کے موقع پر احتجاج کیا گیا، ایس سی او کے موقع پر بھی احتجاج کی کوشش کی گئی، اب بیلاروسی صدر کے دورے کے موقع پر احتجاج کیا جارہا ہے۔
عطاء تارڑ نے کہا کہ یہ ملک دشمن ایجنڈے پر عمل پیرا ہیں، جب کوئی آتا ہے تو یہ احتجاج شروع کردیتے ہیں، کیا احتجاج ملکی معیشت بہتر ہونے کے خلاف ہورہا ہے، کیا یہ احتجاج مہنگائی کم ہونے کے خلاف ہے؟ یہ صرف اپنے لیڈر کیلئے این آر او مانگ رہے ہیں۔
وفاقی وزیر اطلاعات عطاء اللہ تارڑ کا بانی پی ٹی آئی عمران خان کے جیل سے بیان پر دلچسپ تبصرہ کیا ہے۔
عطاء تارڑ کا کہنا ہے کہ ”جیل سے رہا کرو تو احتجاج ملتوی کردوں گا“ کا بیان قیدی کی ”فرسٹریشن اور گھبراہٹ“ کا اعتراف ہے۔
انہوں نے مزید کہا کہ 24 نومبر کو انتشار کی کال کا مقصد ”ڈیل“ کے لیے جدوجہد کرنا ہے۔
وزیر اطلاعات نے کہا کہ جو کہتا تھا کہ ڈیل نہیں کروں گا، اب ”ڈیل کرلو، ڈیل کرلو“ کی صدائیں دے رہا ہے اور وفاق پر لشکر کشی کرنے پر بضد ہے۔
عطاء تارڑ نے کہا کہ آپ سے ڈیل صرف ”قانون“ کرے گا جس کے آپ مجرم ہیں۔
