آسٹریلوی فوج کے سربراہ لیفٹیننٹ جنرل سائمن سٹورٹ نے پاک فوج کے جنرل ہیڈ کوارٹر (جی ایچ کیو) کا دورہ کیا ہے، اور آرمی چیف جنرل سیّد عاصم منیر سے ملاقات کی۔
فوج کے شعبہ تعلقات عامہ کے مطابق قبل ازیں جی ایچ کیو پہنچنے پر آسٹریلوی آرمی چیف نے یادگار شہدا پر پھولوں کی چادر چڑھائی اور پاکستان کے شہدا کو خراج عقیدت پیش کیا۔
آئی ایس پی آر کے مطابق آسٹریلوی فوج کے سربراہ کا جی ایچ کیو پہنچنے پر پرتپاک استقبال کیا گیا، اور پاک فوج کے چاق و چوبند دستے نے انہیں گارڈ آف آنر بھی پیش کیا۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر اور آسٹریلوی فوج کے سربراہ کے درمیان ملاقات میں باہمی دلچسپی کے امور بالخصوص عالمی اور علاقائی سلامتی پر تبادلہ خیال کیا۔
فوج کے شعبہ تعلقات عامہ کے مطابق آرمی چیف جنرل عاصم منیر نے آسٹریلیا کے ساتھ پاکستان کے تعلقات کو سراہا، انہوں نے امن اور استحکام کے مشترکہ مقاصد کے فروغ کے لیے پاک آسٹریلیا تعلقات کی اہمیت اجاگر کی۔
آئی ایس پی آر کے مطابق ملاقات میں دفاع اور سیکیورٹی میں تعاون مزید مستحکم کرنے کے عزم کا اعادہ کیا گیا۔
آئی ایس پی آر نے بتایا کہ آسٹریلوی فوج کے سربراہ نے دہشت گردی کے خلاف پاکستان کی کوششوں کو سراہا اور دونوں ممالک کے درمیان دوطرفہ دفاعی اور سیکیورٹی تعاون کو مزید مضبوط کرنے کے عزم کا اظہار کیا۔
