لبنان کی سرحد کے قریب اسرائیلی قصبے میٹولا میں، اسرائیلی وزیراعظم نیتن یاہو کی آمد سے صرف 20 منٹ قبل ایک ڈرون پھٹ گیا۔

اسرائیلی میڈیا کے مطابق یہ واقعہ اس وقت پیش آیا جب حزب اللّٰہ نے ڈرون حملہ کیا۔ حملے کے نتیجے میں نیتن یاہو نے اسرائیلی فوجیوں سے ملاقات کے لیے میٹولا کا دورہ ملتوی کر دیا۔

دریں اثنا اسرائیلی فوج کو لبنان میں زمینی کارروائی کے دوران شدید مزاحمت کا سامنا ہے۔ حزب اللّٰہ نے اسرائیلی فوجیوں کو گائیڈڈ میزائل سے نشانہ بنانے کی ایک ویڈیو بھی جاری کی ہے، جس سے اس بات کی نشاندہی ہوتی ہے کہ صورتحال کافی کشیدہ ہے۔

اس کے علاوہ، جنوبی لبنان میں اسرائیل کے فضائی حملوں میں دو میڈیکل ورکرز سمیت متعدد شہری شہید ہو گئے ہیں۔ اسی دوران، غزہ میں گزشتہ 24 گھنٹوں میں مزید 35 سے زائد فلسطینیوں کی ہلاکت کی اطلاعات ہیں۔

خاص طور پر کمال عدوان اسپتال کے چلڈرن وارڈ پر ٹینکوں نے گولہ باری کی، جس نے اس علاقے میں انسانی بحران کو مزید بڑھا دیا ہے۔