ماہرین نے بتایا ہے کہ روزمرہ استعمال کی بعض اشیا میں ایسے کیمیکلز پائے جاتے ہیں جو انسانوں میں بانجھ پن کو راہ دے سکتے ہیں۔
امریکی نشریاتی ادارے سی این این نے ایک رپورٹ میں بتایا ہے کہ امریکا میں ایسی بہت سی اشیا گھر گھر استعمال کی جارہی ہیں جن میں بانجھ پن کی راہ ہموار کرنے والے کیمیکلز پائے جاتے ہیں۔
جو کیمیکلز انسانوں کو بانجھ بنانے میں کلیدی کردار ادا کرتے ہیں ان میں فتھیلیٹس، بی پی اے یا بِسفینول اور فلیم ریٹارڈنٹس شامل ہیں جنہیں اصطلاحاً EDC (اینڈوکرائن ڈزرپٹنگ کیمیکلز) کہا جاتا ہے۔
ای ڈی سیز کے گرد گھومنے والا سائنسی لٹریچر تیزی سے بڑھ رہا ہے۔ فیئر فیکس (ورجینیا) کے فارج میسن یونیورسٹی کالج آف پبلک ہیلتھ میں گلوبل اور کمیونٹی ہیلتھ کے پروفیسر ڈاکٹر مائیکل بلوم کا کہنا ہے کہ ان کیمیکلز کے استعمال سے دماغ کا ارتقا، تولیدی صلاحیت اور بلوغت متاثر ہوتی ہیں۔
اب بھی بہت سے سوال ہیں جن کا جواب ای ڈی سیز کے بارے میں تحقیق کرنے والے تلاش کرنے کی کوشش کر رہے ہیں۔ ایسے میں انوائرنمنٹل ورکن گروپ جیسی تنظیمیں (جو اشیائے صرف کو زیادہ سے زیادہ محفوظ بنانے کے لیے میدان میں ہیں) لوگوں کو مشورہ دے رہی ہیں کہ وہ ایسی کوئی بھی چیز استعمال نہ کریں جس کے بارے میں یہ بات پایہ ثبوت کو پہنچ چکی ہو کہ اس کی ترکیب میں بانجھ پن پیدا کرنے والے کیمیکلز شامل ہیں۔
ای ڈی سیز انسانی جسم پیدا نہیں کرتا مگر ان کا اثر ہارمونز کے توازن پر مرتب ہوتا ہے۔ ہارمونز کا تعلق تولیدی صلاحیت، بلوغت اور دماغی ارتقا سے ہے۔ ای ڈی سیز کے اثرات کو نظر انداز کرنا انسان کو بانجھ پن کی طرف لے جاتا ہے۔
