بھارتی خفیہ ایجنسی را کی جانب سے امریکا میں سکھ رہنما کے قتل کی ناکام سازش کا نشانہ بننے والے گروپتونت سنگھ پنون نے امریکا اور کینیڈا کی حکومتوں پر زور دیا ہے کہ وہ بھارتی وزیراعظم نریندر مودی کے خلاف سخت رویہ اختیار کرے جو ناقدین کو ہمیشہ کے لیے خاموش کرانے کی کوششوں میں مصروف ہے۔

غیرملکی خبررساں ادارے ’روائٹرز‘ کے مطابق امریکی محکمہ انصاف نے نیویارک میں امریکہ اور کینیڈا کے دوہری شہری گروپتونت سنگھ پنون کو قتل کرنے کے منصوبے کے سلسلے میں دو بھارتی شہریوں پر فرد جرم عائد کی ہے۔ ملزمان میں سے ایک سابق سرکاری اہلکار ہے جو اس وقت انٹیلی جنس افسر کے طور پر کام کر رہا تھا اور کہا جاتا ہے کہ اس نے قتل کی منصوبہ بندی کی تھی۔

پنون نے بتایا کہ مودی حکومت کو دوسرے ممالک میں دشمنانہ کارروائیاں کرنے کی اجازت نہیں دی جانی چاہیے۔ انہوں نے دعویٰ کیا کہ امریکہ اور کینیڈا میں ہندوستانی قونصل خانے جاسوسی میں ملوث ہیں۔

انہوں نے امریکہ اور کینیڈا پر زور دیا کہ وہ ایکشن لیں، مودی جیسی حکومتوں کو اپنے ممالک میں کام کرنے کی اجازت نہیں دی جانی چاہئے اور انہیں نتائج کا سامنا کرنا چاہئے۔ انہوں نے بھارتی قونصل خانے کو مستقل طور پر بند کرنے کا مشورہ دیا۔