پاکستان میں تعینات چینی سفیر جیانگ ژی ڈونگ نے کہا ہے کہ نئی حکومت کے آنے کے بعد پاکستان اور چین کے درمیان باہمی روابط میں نمایاں اضافہ ہوا ہے۔ انہوں نے اس بات پر زور دیا کہ چار ماہ کے اندر پاک چین قیادت کی دوبارہ ملاقات دونوں ممالک کے قریبی تعلقات کا مظہر ہے۔
اسلام آباد میں اپنی رہائشگاہ پر صحافیوں سے گفتگو کرتے ہوئے جیانگ ژی ڈونگ نے مزید کہا کہ چینی وزیراعظم نے اپنے حالیہ دورے کے دوران پاکستانی قیادت، بشمول صدر، وزیراعظم، اسپیکر، چیئرمین سینیٹ، آرمی چیف، اور دیگر سکیورٹی عہدیداروں کے ساتھ چینی شہریوں کے تحفظ کا معاملہ اٹھایا۔ چین چاہتا ہے کہ چینی شہریوں پر حملوں میں ملوث افراد کو کیفر کردار تک پہنچایا جائے۔
چینی سفیر نے نئی حکومت کے تحت پاکستان اور چین کے تعلقات میں بہتری کی تصدیق کی ہے اور چینی وزیراعظم کے حالیہ دورے کو اس کا ثبوت قرار دیا ہے۔
انہوں نے چینی شہریوں کی حفاظت کے حوالے سے پاکستانی قیادت کے عزم کا ذکر کیا ہے۔ جیانگ ژی ڈونگ نے کہا کہ پاکستان میں دہشتگردی کا شکار ہونے والے چینی شہری معصوم تھے اور وہ پاکستان کی ترقی کے منصوبوں پر کام کر رہے تھے۔
انہوں نے یہ بھی کہا کہ پاکستان میں شنگھائی تعاون تنظیم (ایس سی او) کا کامیاب انعقاد ہوا، اور چینی وزیراعظم نے وزیراعظم شہباز شریف کے ہمراہ گوادر کے جدید ایئر پورٹ کا افتتاح کیا۔
چینی سفیر نے بتایا کہ چینی وزیراعظم کے دورے کے دوران کئی اہم ایم او یوز پر بھی دستخط ہوئے۔ انہوں نے اس بات پر زور دیا کہ پاکستان کی سیاسی و عسکری قیادت نے دہشتگردی کے خلاف عزم کا اظہار کیا ہے اور چینی شہریوں پر حملوں کی تحقیقات کرنے کا وعدہ کیا ہے۔
جیانگ ژی ڈونگ نے پاکستانی فوج اور پولیس کو دہشتگردی کے خلاف لڑنے اور قربانیاں دینے پر خراج تحسین پیش کیا۔ جیانگ ژی ڈونگ نے پاکستان میں چینی شہریوں کی حفاظت اور دہشتگردی کے خلاف عزم کا اظہار کیا۔
